CONGALSA celebrou un ano máis o seu tradicional Concurso de Receitas, que xa chegou á súa terceira edición, o obxectivo renovado de “distinguir os mellores pratos elaboradores polos seus traballadores”. A xeito de novidade, a convocatoria deste ano incluíu unha categoría específica para enxalzar as receitas elaboradas con produtos da empresa. As outras tres modalidades foron as seguintes: mellor entrante, mellor prato principal e mellor sobremesa.
A este III Concurso de Receitas de Congalsa presentáronse 26 pratos diferentes nas devanditas modalidades.
Resultaron gañadores Andrés Mouzo, na categoría entrante, coa súa proposta de tataky guacamole; Irene Souto, autora do mellor prato principal: robaliza; Reyes Vidal; en categoría sobremesas (postres), con profiteroles de cardamomo e lemon curd; e de novo Andrés Mouzo, en receitas elaboradas con referencias da compañía, polo prato HojalBurguer.
Os prestixiosos chefs Kike Piñeiro e Eloy Cancela foron os encargados de seleccionar as propostas gañadoras. Os premiados poderán gozar dunha cea para dúas persoas no restaurante compostelán A Horta do Obradoiro.
Unha iniciativa que se consolida
A primeira edición deste concurso levouse a cabo en 2020 durante o confinamento, co espírito de promover accións de dinamización interna no marco do Proxecto Persoas de CONGALSA. “O certame acadou agora a súa terceira edición consolidado como unha das accións máis esperadas polo persoal que pode, deste xeito, desenvolver a súa creatividade culinaria”, destaca Isabel Cañas, directora de Relacións Externas da empresa. Este ano, ademais, por vez primeira con todas as propostas presentadas, CONGALSA editará unha publicación a modo de receitario.
