A Deputación da Coruña presentou este luns 11 de abril a nova convocatoria de axudas do seu Plan de Emprego Local, o PEL-2022. Un dos puntos máis destacados do novo plan é sen dúbida o seu orzamento inicial, que este ano é de 7.260.000 euros para apoiar a contratación de persoal, a realización de investimentos nos negocios e a sufragar os custos das cotas á Seguridade Social por parte dos autónomos. De feito, todas as liñas de axudas PEL ven incrementado o seu orzamento inicial nesta nova edición.
Os datos foron achegados polo presidente da Deputación da Coruña, Valentín González Formoso e o deputado responsábel da área de Emprego, José Ramón Rioboo. “Estamos ante o PEL cun maior orzamento inicial”, afirmou Valentín González Formoso, que explicou que o PEL 2022 incrementa nun 38% o orzamento con respecto ao pasado ano e, polo tanto, “permitirá seguir creando emprego e impulsar con axudas de entre 1.200 e 45.900 euros a reactivación económica, o pequeno comercio, as persoas autónomas e microempresas nun contexto económico complexo e adverso”.
Formoso explicou que, dos 7,2 millóns de orzamento do PEL, 3,5 destinaranse a subvencionar a contratación e ao mantemento de persoas traballadoras, 2,76 millóns a novos investimentos en pequenas empresas de recente creación e 1 millón á liña PEL-Autónom@s que, segundo fixo saber, “tivo unha grande demanda no seu primeiro ano, polo que en 2022 ve duplicado o seu orzamento”.
Unha aposta transversal de 100 millóns nun período de seis anos
O presidente explicou que o PEL é unha aposta transversal do Goberno da Deputación ao que se destinaron 100 millóns de euros nos últimos seis anos. “Grazas a este investimento sen precedentes na área de emprego, nos 6 anos transcorridos desde a creación do PEL, a Deputación axudou a crear 4.500 empregos, apoiou a 3500 empresas e creou unha rede de provincial de espazos de coworking que xa conta con once centros en funcionamento”, engadiu.
Estimacións actuais
As estimacións do Goberno provincial son que as axudas á contratación permitan crear 300 empregos este ano, que máis de 500 persoas autónomas poidan acceder á subvención das cotas da Seguridade Social durante un ano e que máis de 400 pemes reciban o apoio económico da Deputación para investimentos que melloren a competitividade dos seus negocios.
