O Concello de Ribeira anunciou o comezo dos traballos para instalar en diferentes espazos urbanos a sinalización do itinerario xacobeo da nosa comarca, o Camiño A Orixe. Os postes indicativos xa están visíbeis, neste primeiro treito dos traballos, nas rúas de Corrubedo. A súa instalación é unha iniciativa da Mancomunidade Barbanza Arousa en colaboración coa Asociación de Amigos do Camiño A Orixe.
Os postes —un total de 155— foron elaborados polo alumnado do obradoiro de emprego Serra do Barbanza e por sete usuarios asistentes ao obradoiro de carpintería da UAD (Unidade de Atención a Drogodependencias).
Como dixemos, os labores de instalación comezaron por Corrubedo, punto de arranque desta ruta xacobea, e continuarán polo resto do itinerario dentro do noso concello, que abrangue a primeira etapa (ata a Capela da Guía en Carreira) e unha parte da segunda, que finaliza na veciña A Pobra do Caramiñal na Igrexa de Santa María A Antiga.
O Concello de Ribeira explicou que a iniciativa conta coa particularidade de que se sinaliza tanto o traxecto de ida (en dirección a Santiago de Compostela) como o de volta (indo cara o cabo barbanzán).
Na acción colaborou tamén a Policía Local.
Dende o Consistorio lembran tamén que os usuarios da UAD tamén estiveron traballando na sinalización ao Parque Natural Complexo Dunar de Corrubedo e Lagoas de Carregal e Vixán.
