O Fondo Galego de Cooperación organiza este martes un webinar para axudarnos a canalizar do mellor xeito a axuda a Ucraína

Mentres a invasión rusa de Ucraína faise cada día máis dramática e virulenta, medra a solidariedade do pobo galego en cóntanse por milleiros as familias que queren axudar pero teñen dúbidas sobre como facelo, entre outras cousas pola gran cantidade de iniciativas a título individual que se están a levar á práctica.

Así, co obxectivo de resolver todas as dúbidas sobre o mellor xeito de canalizar a solidariedade co pobo ucraíno e de frear o que as ONG da nosa terra cualifican de “malas prácticas detectadas tanto no envío de axuda humanitaria como na acollida das persoas refuxiadas”, o Fondo Galego de Cooperación e Solidariedade organiza este martes 15 de marzo ás 12 horas un webinar informativo no que representantes de tres organizacións que están a traballar sobre o terreo contarán as súas experiencias e achegarán diversas claves prácticas para axudarnos a materializar o noso apoio do mellor xeito posíbel. Trátase de Juan Redondo, Cruz Vermella Española en Galicia, Susana Fernández, do Movemento pola Paz -MPDL- Galicia, e Beatriz Villarquide e María Gento, ambas de Farmacéuticos Mundi (Farmamundi). As inscricións para participar no seminario en liña pódense facer xa na Rede.