O BNG de Outes cualifica de “inviábel” o proxecto de solo industrial proposto polo Goberno local

A voceira municipal do BNG en Outes, María Xosé Suárez Castro, compartiu nas redes o seu posicionamento sobre a proposta de solo industrial que vén de presentar o Goberno local de Manuel González. No vídeo publicado, a agrupación nacionalista critica o plan municipal e considérao “inviábel”.

Tamén lembra que no seu día o BNG advertira que o terreo escollido tiña afectación de Costas, cousa que vén de confirmarse. “Aínda así, o Concello segue a apostar por esta localización, o que lle obrigaría, para cumprir os requirimentos dos informes de Costas, á adquisición do dobre de terreo e a deixar un pulmón verde, mentres a edificabilidade, de 81.000 metros cadrados, queda igual”. Suárez di que é “un gasto innecesario para a veciñanza de Outes, xa que mercarán terreos que terán a monte e que haberá que manter”.

Ademais, o BNG sostén que non hai información concreta sobre o que vai pasar coa rede de saneamento. Nós, dixo, “temos serias dúbidas sobre a capacidade da depuradora da Serra para asumilo”. A agrupación tamén critica que non se saiba que pasar coa rede viaria para dar saída e entrada ao novo polígono. E concluíu: “Sabemos que este parque é necesario, pero é importante traballar tamén noutras opcións”.