As Concellarías dos Servizos Sociais dos municipios que conforman Barbanza Arousa mantiveron neste 18 de marzo unha mesa de traballo para expoñer as liñas mestras que se seguen nos Concellos e analizar outras a desenvolver de maneira conxunta, ademais de intercambiar pareceres sobre os programas e servizos que se prestan. Na reunión estiveron presentes as edís Amparo Cerecedo (A Pobra do Caramiñal), Ana Barreiro (Ribeira), Hadriana Ordóñez (Rianxo) e Raúl Treus (Boiro). No transcurso da xuntanza abordaron diversas cuestións, tales coma os proxectos impulsados para incrementar o benestar social, a evolución do número de persoas en situación de vulnerabilidade e as iniciativas a pór en marcha no relativo á situación de emerxencia humanitaria na Ucraína.
