Amicos vístese de morado para celebrar o 8M


A asociación Amicos compartiu o seu programa de actividades para celebrar esta semana o Día Internacional da Muller, o 8M. Trátase da Semana Morada de Amicos, que irá adicada ás deportistas paralímpicas, que serán entrevistadas pola comunidade de Amicos e de centros escolares externos á asociación (dos que forman parte algúns dos nenos do Centro de Educación Especial). A organización inclusiva da nosa comarca dará visibilidade ás accións previstas a través das redes sociais (Instagram, Facebook, Twitter, LinkedIn e Youtube) con pequenas entrevistas e xogos.

As deportistas que se prestaron para realizar a actividade, con grandes éxitos ás súas costas, son: Desirée Vila, atleta paralímpica de atletismo adaptado; Susana Rodríguez, campioa paralímpica de triatlón adaptado; Eva Moral, prata no Campionato Mundial de triatlón adaptado; Miriam Martínez, subcampioa paralímpica de atletismo adaptado; e Adiaratou Iglesias, bicampioa paralímpica de atletismo adaptado.

Ademais das entrevistas por escrito, dende o Centro de Educación Especial organizouse unha entrevista por videochamada, realizada polos propios nenos, con Desirée Vila. Esta será publicada en redes o martes 8.

Amais, no Centro de Atención Integral de Amicos realizaranse diferentes actividades durante o luns 7 e martes 8 (saídas en comunidade, realización de traballos manuais, investigación sobre a vida das deportistas…).

Amicos tamén informou da súa adhesión á campaña baixo o título Dá a cara pola igualdade, organizada por FADEMGA. Coa campaña búscase mostrar casos concretos de éxito a través de fotos ou vídeos de
mulleres con discapacidade intelectual, onde sexan elas as que expliquen os logros que conseguiron na súa vida en materia de autonomía, emprego, vivenda en comunidade, educación…