A entidade Amas de Casa de Ribeira emitiu un comunicado no que mostra o seu total rexeitamento a “calquera tipo de violencia” en relación á invasión rusa en Ucraína, pobo ao que a asociación amosa o seu apoio e a súa solidariedade. “Queremos manifestar a nosa enérxica repulsa aos feitos acontecidos”, declaran as Amas de Casa de Ribeira, engadindo que baixo o seu punto de vista “é incríbel que en pleno século XXI sigan acontecendo este tipo de afrontas coas perdas humanas que isto carrexa, así como ou éxodo masivo de familias atemorizadas cun futuro incerto”.
E engaden: “Pedimos a paz en tódalas nacións do mundo e que os nosos gobernantes tomen as medidas para evitar toda esta incerteza mundial e ao mesmo tempo apoien ó pobo ucraíno que ten que abandonar ou seu país e a súa vida feita con moitos sacrificios, con todo ou que isto representa”.
Por todo o devandito a asociación convoca a toda a cidadanía de Ribeira e do Barbanza a unha concentración este venres (ás 20.00 horas) na praza do Concello da cidade.
