A Pobra celebra o Día Internacional dos Monumentos cunha andaina cultural polas pegadas valle-inclanianas no concello

O Concello da Pobra do Caramiñal vai celebrar o Día Internacional dos Monumentos e Sitios, o vindeiro 18 de abril, cunha andaina cultural e participativa para “redescubrir varios enclaves locais de interese, relacionados co ronsel valle-inclaniano”. A actividade, organizada pola Concellería de Cultura, foi dada a coñecer nos seus detalles pola edil da Cultura, Patricia Lojo (PSdeG-PSOE), acompañada de persoal municipal adscrito ao Museo Valle-Inclán, Araceli Abad e Dolores Devesa.

A dita cita cultural terá lugar no 3 de abril, a partir das 11.30 horas. Segundo informaron, elixiuse esta data “para así non solaparse con outras actividades xa programadas pola Semana Santa”.

O percorrido comezará na igrexa de Santa María A Antiga do Caramiñal para, deseguido, achegarse ata a Torre de Xunqueiras, a praia dos Areos e concluír a travesía no Museo Valle-Inclán. A duración aproximada é de 45 minutos e a dificultade é baixa. Contarase coa colaboración da Deputación da Coruña e da Asociación Amigos do Camiño de Santiago do Barbanza. A Orixe.

A actividade é de balde e as persoas interesadas en participar deben inscribirse no teléfono de contacto 981 831 662.