A Mancomunidade Barbanza Arousa convoca ao sector empresarial para participar en mesas de traballo

A Mancomunidade Barbanza Arousa convocará nos vindeiros días a todas as empresas do sector turístico do territorio para a súa participación nas mesas de traballo previas á solicitude dos Plans de Sustentabilidade Turística convocados polo Ministerio de Industria, Comercio e Turismo.
As mesas de traballo desenvolveranse por duplicado, en dúas xornadas, para que os participantes poidan elixir data e lugar máis conveniente . A primeira delas celebrarase o luns día 4 de abril ás 17:30h no Auditorio do Museo Valle-Inclán na Pobra do Caramiñal e a segunda o mércores 6 de abril ás 09:30h no Viveiro de Empresas do Concello de Boiro.
Desde a Mancomunidade estase a realizar un gran esforzo por tratar de chegar a todas as empresas que estean interesadas en participar nestas xornadas. O enderezo de correo electrónico info@barbanzarousa.gal atópase dispoñible para recibir inscricións daquelas empresas interesadas.
Así mesmo, desde a Mancomunidade enviouse a todas as empresas unha enquisa online para que poidan transmitir o seu parecer sobre diversos aspectos turísticos do territorio.
Espérase que en próximos días se inicie a convocatoria extraordinaria dos Plans de Sustentabilidade Turística, incluídos no Plan de Recuperación, Transformación e Resiliencia do Estado, que nesta ocasión teñen como temática a enogastronomía.

Museo Valle-Inclán na Pobra do Caramiñal