Volve a Festa da Chuvia e faino ademais pola porta grande (con dez bandas de impacto) e constatando unha capacidade para reconverterse e adaptarse a novos formatos da que non pode presumir case ningún outro festival musical. Agora, despois dos obrigadas parénteses motivadas pola COVID, iníciase unha colaboración co Concello de Rianxo que promete dar moito que falar (e que escoitar). A festa celebrarase en dúas quendas. A primeira será o sábado 9 de abril, en formato “terra firme”, e a segunda o domingo 10, en formato acuático (cun barco que levará a troula até o medio e medio da ría).
Respecto da primeira quenda, a do sábado, segundo confirmaron os organizadores (o ribeirense Suso Bello e a súa banda A Compañía do Ruído), contará coa presenza de Canción Desastre, Os Bar Ban Sónicos, Grampoder, Broa, Machina, Banda de Gaitas Buxaina, Chamaquito Pistolas, Boroa, Radio Zapa e Tecor Societario. O programa, amais de música, inclúe unha Xinkana Poética Rianxeira e máis un Obradoiro Millo Verde. Asemade, a operadora de telecomunicacións ribeirense Toxo Telecom confirmou que fai fretar un autobús para carrexar aos seareiros a Rianxo (o Toxobús). O evento tamén contará coa importante colaboración da Cafetería Castelao, en Rianxo, que se comprometeu a alimentar aos asistentes cunha paella. A organización da Festa da Chuvia informou de que a viaxe de ida e volta facilitada por Toxo, a consumición e o prazo de paella terá un custe de só dous euros. O Toxobús fará escalas en Ribeira (ás 10.00 horas), en Palmeira (ás 10.30 horas), na Pobra do Caramiñal (ás 10.40 horas) e máis en Boiro (sobre as 10.50 horas).