Pobra rende homenaxe a Rosalía de Castro cunha ofrenda cívica, unha mostra e un xogo-concurso

Este 23 de febreiro é o Día de Rosalía de Castro e o Concello da Pobra do Caramiñal quixo sumarse novamente a esta importante celebración. Faino organizando varias propostas coas cales continuar co labor divulgativo da nosa poeta inmortal, tal e como explicaron a concelleira da Cultura, Patricia Lojo (PSdeG-PSOE), e a técnica municipal desta área, Fita Sanisidro. Como novidade, instalaranse nos Xardíns de Valle-Inclán uns paneis informativos que fan un repaso pola biografía de Rosalía e amosan tamén fotografías súas.

Así mesmo, no propio día 23 efectuarase a tradicional ofrenda cívica na praza que leva o nome da escritora, ás 13.00 horas.

Impúlsase, ademais, unha nova edición do xogo-concurso As Sete Rosalías, co cal achegar ás crianzas a figura da intelectual galega “dun xeito didáctico e cun compoñente lúdico”, explicaron, salientando a boa acollida desta experiencia na edición do ano pasado e agradecendo a colaboración e disposición da trintena de locais participantes.

A dinámica, sinalaron, é a mesma cá do pasado ano: consiste en atopar varias siluetas recortadas coa forma de Galicia que conteñen no seu interior o rostro de Rosalía acompañado de versos seus. Lémbrase que estas pezas xa están expostas nos escaparates de diversos establecementos da localidade dende o día 11 e permanecerán ata o día 25 de febreiro. O desafío reside en buscar as 7 versións diferentes da imaxe que ilustra o cartel. Unha vez atopadas, será preciso anotar no folleto cal é esa diferenza e en que instalación se sitúa. Poden participar todos aqueles nenos e nenas pobrenses con idades comprendidas entre os 6 e 12 anos que conten cun dos impresos repartidos nos colexios Salustiano Rey Eiras e Pilar Maestú Sierra. De lograren superar o reto, deben entregar os impresos debidamente cubertos cos datos requiridos nos centros de ensino devanditos. Sortearanse 50 lotes de agasallos entre tódolos cativos e cativas acertantes, no 4 de marzo.