Dende a Axencia de Desenvolvemento Local do Concello de Outes comunican a posta en marcha dun novo proxecto de emprendemento dirixido a revitalizar o tecido económico e empresarial local, amais de achegar novas oportunidades de actividade laboral. O proxecto inclúe un plan de formación para as persoas emprendedoras ou para aquelas que queiran analizar a viabilidade dunha idea de negocio.
O proxecto tentará resolver as seguintes preguntas:
-Como analizar unha idea de negocio?
-Como identificar o mercado potencial dun proxecto?
-Como facer un estudo de viabilidade económica?
A iniciativa acompáñase a maiores dun plan de asesoramento personalizado para a elaboración do plan de negocio para as/os alumnas/os de ciclos de Formación Profesional.
As persoas interesadas nestes servizos de formación poden chamar ao teléfono do Concello (981 850 003) e preguntar por Carlos Rodríguez, ou ben enviar un correo electrónico a carlos.rodriguez@outes.gal.
