O TSXG rexeita suspender unha orde da Xunta con medidas preventivas fronte á COVID-19 por non estar vixente

O Tribunal Superior de Xustiza de Galicia (TSXG) rexeitou a solicitude do presidente provincial de Vox en Pontevedra de suspender, de forma cautelar, a orde da Consellería de Sanidade publicada no Diario Oficial de Galicia (DOG) o 30 decembro de 2021. Nela establecíanse medidas de prevención como consecuencia da evolución da situación epidemiolóxica derivada da COVID-19 na comunidade autónoma, e, ademais, aprobábase o novo Plan de Hostalería Segura de Galicia. A Sala, de acordo co criterio do Ministerio Fiscal, denegou a suspensión porque a orde xa non está vixente, pois tivo efecto ata o 18 de xaneiro de 2022. Esa carencia sobrevinda de obxecto conleva, segundo explica o tribunal no auto, a terminación do incidente cautelar. Contra a resolución cabe presentar recurso de reposición.