A área de Cultura de Rianxo preparou unha axenda ateigada de actividades para o punto de inflexión entre febreiro e marzo: unha axenda para desfrutar coas amizades e coa familia pero ante a cal é preciso seguir mantendo normas de seguridade anti-COVID e “sermos prudentes”, en palabras do dito departamento.
As actividades comezan o sábado 26 de febreiro, cunha serie de obradoiros e xogos diversos a cargo de Infantilandia. Serán entre as 16.30 e as 19.30 horas, na praza Castelao.
Na mesma xornada do 26, a partir das 18.30 horas, celebrarase unha actividade de animación musical na mesma praza Castelao e nas rúas da vila de Rianxo, a cargo do músico multi-instrumentista, animador e clown Pulpiño Viascon.
Ao día seguinte, domingo 27 de febreiro, as rúas de Rianxo acollerán a partir das 12.30 unha ruada a cargo de SDK e Barafunda.
Pola tarde, entre as 17.00 e as 19.00 horas, a vila rianxeira será o escenario dunha festa tribal, un espectáculo de animación e ruada para manter ben alto o nivel de festividade deste Entroido 2022.
Xa no mes de marzo, o martes día 1, a axenda collerá impulso na Aula Activa do Mar, a partir das 12.00 horas, cunha iniciativa de obradoiros de máscaras de Entroido. As prazas serán limitadas. O Concello lembra que as persoas que requiran máis información e formalizar as inscricións poden facelo a través da conta de correo museodemanuelantonio@concelloderianxo.gal.
Pola tarde, o martes 1 de marzo, a praza Castelao acollerá unha nova ración de obradoiros e xogos a cargo de Infantilandia. Será en horario de 16.30 a 19.30 horas.
Sen saírnos da céntrica praza Castelao de Rianxo, ás 18.30 horas está previsto que comece o espectáculo A Vida Tola, a cargo da artista de clown, humorista e escapista Natalia Outeiro, tamén coñecida como Pajarito.
A área de Cultura de Rianxo fai saber que en caso de climatoloxía adversa, é posíbel que se fagan variacións no programa de actividades, por exemplo cambiando localizacións. Para estar ao tanto destes trocos podemos visitar a web concelloderianxo.gal.
