O Entroido pobrense repartirá 1.450 euros en premios entre os mellores disfraces

O Entroido da Pobra será un Entroido para grandes e pequenos, dando protagonismo á creatividade e á diversión en diferentes espazos da vila e, cómpre recordalo, nun ambiente de seguridade sanitaria. Os detalles do programa foron dados a coñecer pola concelleira de Cultura, Patricia Lojo, e máis a técnica Fita Sanisidro. Segundo fixeron saber a axenda recupera a maior parte das propostas agás o desfile. A programación deste 2022 aposta por concursos cos cales premiar a creatividade da veciñanza á hora de elaborar os seus disfraces e que repartirán un total de 1.450 euros.

Un dos certames será o 26 de febreiro e está destinado a persoas maiores de 13 anos. No Cantón da Leña habilitarase un photocall e unha discomóbil dende as 19.00 ata as 00.00 horas. Establécense dúas categorías coas súas correspondentes cinco distincións: individual/parellas (un primeiro premio, de 125 euros; un segundo, de 100; un terceiro, de 75; un cuarto, de 50 e un quinto, de 25) e grupo (un primeiro premio, de 200 euros; un segundo, de 150; un terceiro, de 100; un cuarto, de 75 e un quinto, de 50). As inscricións para participar realizaranse na propia praza e as imaxes serán tomadas por un fotógrafo para, posteriormente, remitilas ao xurado.

Para esa mesma xornada concíbense dúas actividades itinerantes: a charanga Oito nun Piso amenizará as rúas a partir das 13.00 horas; mentres que Troula Animación fará o propio co seu espectáculo A invasión pirata, das 20.00 horas en diante.

Doutra banda, o día 27 de febreiro estará dedicado aos cativos e cativas cunha festa infantil que se desenvolverá na praza Alcalde Segundo Durán, en horario de 16.30 a 19.30 horas, e para a cal é necesaria a inscrición previa a través da Rede, Haberá discomóbil, inchábeis, maxia, chocolatada, obradoiros e un concurso no cal poderán participar todas aquelas crianzas con idades inferiores aos 12 anos. Entregaranse cinco galardóns: un primeiro, de 150 euros; un segundo, de 125; un terceiro, de 100; un cuarto, de 75 e un quinto, de 50. En caso de chuvia trasladarase ao CEP Salustiano Rey Eiras.

E, finalmente, para o día 1 de marzo, Martes de Entroido, haberá un toque musical e gastronómico. A partir das 19.00 horas, a charanga Oito nun Piso volverá á Pobra para percorrer as rúas da vila e no Cantón da Leña disporase dunha degustación de filloas e orellas. Posteriormente, ás 20.00 horas, na referida praza procederase coa entrega dos premios ás persoas gañadoras do concurso do día 26 de febreiro, que deberán ir ataviadas cos disfraces que resultaron distinguidos.

As bases están á disposición na páxina web www.apobra.gal.