O BNG de Outes denuncia os recortes en transporte público no concello

O BNG de Outes, a través da súa voceira municipal María Xosé Suárez Castro, vén de compartir un vídeo nas redes no que a agrupación denuncia o que considera unha nova discriminación para o termo municipal: “Os novos recortes que leva a cabo a Xunta de Galiza con respecto ao transporte público de Outes”.

Para o BNG, trátase dun novo capítulo “dos castigos ao que o Goberno galego somete ao rural”. Segundo di, os recortes no transporte público deixarán a unha manchea de parroquias sen autobús, directamente. Entre elas atópase Cuns, que foi declarada aldea modelo no seu día e para a cal buscáronse iniciativas que axudasen a fixar poboación. “Malamente entendemos nós que este sexa un xeito de incrementar os residentes dun lugar”, sinala a voceira municipal do BNG. Por certo que a denuncia dos recortes en transporte público debaterase no Parlamento galego.