Detidos catro veciños da Pobra por roubos en locais de hostalería


A Garda Civil do Posto de Boiro detivo a catro homes veciños da localidade coruñesa da Pobra do Caramiñal por varios delitos de roubo en locais de hostalería.

Segundo informou o Instituto Armado, os feitos ocorreron por mor de varios roubos nos últimos meses en locais de hostalería da localidade da Pobra, así como nunha vivenda e dúas embarcacións.
A Garda Civil logrou a identificación plena dos autores dos mesmos, que resultaron ser veciños desta localidade, coñecidos das forzas de seguridade por ilícitos da mesma índole, destacaron as mesmas fontes.

A Benemérita procedeu á detención destas catro persoas como presuntas autoras de roubos con forza en locais de hostalería, nunha vivenda habitada e dúas embarcacións das que subtraeran diversa ferramenta.

Sobre dous dos detidos pesaban senllas ordes de detención por parte dun Xulgado de Instrución de Ribeira pola súa implicación noutros roubos cometidos anteriormente.

As mesmas fontes indican que a contía do subtraído ascende a máis de 4.700 euros, así como “gran cantidade de bebidas e comida”, engaden. Os detidos, xunto coas actuacións realizadas, foron postos ao dispor do xulgado de Instrución de garda de Ribeira, que decretou a súa liberdade con cargos.

Cuartel de Boiro da benemérita