A Asociación Ambar dar persoas con diversidade funcional abriu as inscricións para a formación Actividades Auxiliares de Comercio e Entrega e Recollida a Domicilio que impartirá no seu Centro de Recursos da Barbanza, emprazado en Frións, Ribeira. A actividade comezará o 1 de marzo e celebrarase de luns a venres no Centro de Recursos da Asociación Ambar en Ribeira (San Roque/Frións) de 10.00 a 14.00 horas.
Esta formación está destinada a persoas con diversidade funcional e ten como obxectivo “facilitar que obteñan un perfil polivalente na área de comercio”, ocupando postos como, entre outros, de repoñedores, repartidores ou auxiliares de comercio.
A formación, totalmente gratuíta, conta cun bolsa de asistencia de 9 euros ao día e a posibilidade de transporte adaptado. O grupo será dun máximo de 10 persoas.
Esta formación é posíbel grazas ao financiamento da Fundación ONCE concedida ao abeiro da convocatoria de axudas económicas Uno a Uno de 2021, e enmárcase no Programa de Emprego Operativo de Inclusión Social e Economía Social POISES 2014-2020 co-financiado polo Fondo Social Europeo (FSE).
300 horas de contidos
Esta formación está destinada a ocupación de persoas son diversidade funcional no sector do comercio. A formación conta cun total de 300 horas, divididas en 180 horas de formación teórica e 120 horas de formación práctica en empresa. Comezará o 1 de marzo de 2022 e rematará o 21 de xuño de 2022 (primeira quenda de prácticas) ou o 4 de agosto de 2022 (segunda quenda de prácticas).
As persoas interesadas poden formalizar a súa inscrición:
• Chamando directamente ó 981 87 44 80
• Escribindo á conta de correo empregoinclusivo@asociacionambar.og
• Ou na web da entidade, asociacionambar.org.
