A Policía Local da Pobra refórzase con catro novos axentes

O Consistorio da Pobra acolleu este 10 de febreiro a incorporación oficial de catro novos axentes ao corpo da Policía Local. As incorporacións fixéronse a través do proceso de mobilidade (ao solicitar un dos novos axentes o municipio do Caramiñal como destino ao que trasladarse) e, tamén, coa superación das probas pertinentes na Academia Galega de Seguridade Pública. Esta precisamente foi a vía pola que se integraron no corpo tres dos novos policías, que, segundo lembran fontes do Concello, xa están familiarizados co termo municipal a ter realizado nel as súas correspondentes prácticas, nos períodos do día 10 de xullo ata o día 5 de setembro de 2021 e dende 23 de decembro de 2021 ata 31 de xaneiro de 2022.

Deste xeito, o cadro de persoal pasa a estar conformado por 10 policías.

Na xornada deste 10 de xaneiro efectuouse a toma de posesión dos novos axentes nun acto que se desenvolveu no salón de plenos e que contou coa asistencia de membros da Corporación municipal, do mencionado corpo policial e tamén representantes da Garda Civil e da Protección Civil.

O alcalde, Xosé Lois Piñeiro (Nós Pobra), puxo en valor o traballo destes profesionais e manifestou que se seguirá traballando no reforzo dos recursos, tanto materiais coma humanos, deste corpo policial, poñendo como exemplo a reforma das dependencias efectuada a finais do 2019. Agradeceu, así mesmo, o traballo da Garda Civil e da Protección Civil e cualificou a xornada de hoxe de “histórica” coa entrada dos catro novos axentes.

Pola súa parte, o concelleiro da Seguridade, José Andrés Lojo (Nós Pobra), fixo lectura dun documento datado de 1911 onde se deixa constancia do nomeamento dun axente na localidade e destacou que, 111 anos despois, “é a primeira vez que temos dúas compañeiras, dúas mulleres no corpo”. Apuntou, ademais, que a fórmula dun bo policía é “coñecementos máis habilidade multiplicado por actitude” e fixo unha proclama a prol da unidade.

A este respecto tamén se referiu o xefe da Policía local, José Manuel Cameán, quen salientou a valía profesional e boa relación coa veciñanza e declarou que a incorporación de dúas mulleres supón “un paso moi importante na igualdade e que veña para quedar”.