A Pobra acolle dúas novas sesións formativas sobre sustentabilidade agraria

O Concello da Pobra, a través da área de Promoción Económica que dirixe Charo Varela (Nós Pobra), vai organizar dúas novas sesións formativas relativas ao proxecto local para o aproveitamento de excedentes agrarios. As sesións serán impartidas por persoal da Granxa Burbullas de Sol (Vedra). A primeira delas, Pragas e outras lerias das leiras (ecolóxicas), celebrarase o 16 de febreiro; mentres que a segunda, que leva por título Plantas para coidar a horta, será no día 23. Ambas transcorrerán no Auditorio do Museo Valle-Inclán, a partir das 19.00 horas.

Abertas a toda a cidadanía en xeral, é necesaria inscrición previa a través do teléfono de contacto 981843280, marcando a extensión 2035, ou no enderezo electrónico promocion.economica@apobra.gal.

Cómpre lembrar que entre os obxectivos do referido proxecto do Concello da Pobra atópanse poñer en valor a produción agrícola das pequenas explotacións do concello; fomentar consumo de alimentos de calidade e de proximidade (quilómetro 0); xerar actividade económica a partir dos produtos de tempada; dinamizar o comercio local, neste caso, a través dunha plataforma dixital; fomentar a actividade agraria; e promover un estilo de vida saudábel e sustentábel.