A Academia Galega do Audiovisual anunciou na mañá deste 10 de febreiro, desde o showroom de Cafés Candelas en Lugo, os nomes dos proxectos e profesionais finalistas da XX edición dos Premios Mestre Mateo. Foi no transcurso dun “café entre amigos” coa presenza de Alba Mancebo, Esther Estévez, Beatriz Serén, Luis Iglesia e María Costas, que desvelaron as candidaturas finalistas.
Cuñados, Jacinto, Malencolía e Tres son finalistas á Mellor longametraxe, mentres que A poeta analfabeta, A virxe roxa, O gran camiño e Welcome to ma maison sono a Mellor documental. As finalistas a Mellor serie son Hierro, A lei de Santos, Auga Seca e Método Criminal e a Mellor serie web as series Cacola, Delicias Amargas, Mataría Microserie e Xela Arias. A palabra esgazada.
A primeira rolda de votacións das académicas e académicos converte ao filme Cuñados na produción máis votada, acadando 16 candidaturas finalistas, seguida por Jacinto e Malencolía con 11, a serie Hierro, con 8, e Eles transportan a morte e Tres con 6.
Os directores dos traballos máis votados, Alfonso Zarauza, Javi Camino, Jorge Coira e Toño Chouza, competirán polo premio á Mellor dirección.
Cuñados acapara 6 candidaturas finalistas nas categorías de interpretación, cos tres protagonistas do filme, Federico Pérez, Miguel de Lira e Xosé A. Touriñán competindo polo trofeo a Mellor interpretación masculina protagonista, xunto con Pedro Brandariz, por Jacinto.
Malencolía logra 5 candidaturas finalistas para os seus intérpretes, recoñecendo o traballo das actrices de reparto Iolanda Muíños e Ledicia Sola e a protagonista Melania Cruz, así como o de Diego Anido e Ricardo de Barreiro, na categoría de Mellor interpretación masculina de reparto.
Dos 32 programas de TV presentados os votos das académicas e académicos elixiron Cinephilia, Clac, Cos pés na terra e Dígocho Eu e o traballo de Esther Estévez, Paco Lodeiro, Rodrigo Vázquez e Simone Saibene na categoría de Mellor comunicador/a.
O vídeo-clip da canción Figa de Tanxugueiras é finalista xunto con El volcán de Pablo Lesuit, Fukushima de Triángulo de amor bizarro e Voucho contar así de Grupo Antilia.
Pola súa banda, A comuñón da miña prima Andrea, Augas Abisais, Aura e Fracturas son as finalistas na categoría de Mellor curtametraxe; e E Lalín… sóache?, Las estrellas del camino. Miradas de resistencia, Redes vivas e Xacobeo, camiña a Galicia na de Mellor anuncio.
A gala de entrega de premios na que se coñecerá o palmarés dos XX Mestre Mateo terá lugar o sábado 19 de marzo no recinto de Expocoruña.
