A 42 edición do evento FITUR, a Feira Internacional de Turismo que se celebra en Madrid desde este mércores 19 de xaneiro, acolleu na súa primeira xornada de actividades o relatorio Barbanza Arousa, experiencias na Orixe da tradución xacobea. Nel participou Gonzalo Trenor, delegado da Xunta en Galicia.
O representante do Goberno autonómico puxo en valor “o excelente traballo do xeodestino de Barbanza Arousa para achegar ao peregrino unha alternativa ao roteiro Mar de Arousa e Río Ulla de forma terrestre, ofrecendo aos visitantes a posibilidade de realizar a ruta A Orixe”. Neste senso, apuntou que “a posta en valor desta ruta non foi doada” e felicitou a todas a entidades implicadas (as que integran a Mancomunidade Barbanza Arousa, formada polos concellos de Rianxo, Boiro, A Pobra e Ribeira) deste xeodestino “polo seu traballo, bo facer e excelentes resultados que contribuirán decididamente no proceso de reactivación e recuperación dos viaxeiros, que valoran produtos turísticos como os que se ofertan neste destino, baseados na natureza, o contacto coa poboación local e a calidade”.
Trenor rematou a súa intervención subliñando que “a colaboración entre administracións e o sector turístico sitúanos no camiño correcto para fortalecer a marca turística do Barbanza como parte esencial da marca Destino Galicia” e apuntou que “para lograr este obxectivo esta mancomunidade conta coa Xunta de Galicia”.
