O TSXG autoriza á Xunta manter a esixencia do certificado covid e a prohibición de reunións de non conviventes na rúa nas madrugadas das fins de semana
O Tribunal Superior de Xustiza de Galicia (TSXG) autorizou á Xunta a prórroga ata o próximo 29 de xaneiro das medidas antocivid que foron aprobadas antes de fin de ano para facer fronte á sexta onda da pandemia.
Entre elas, a prohibición de reunións entre non conviventes entre as 3 e as 6 da madrugada, que a partir da semana que vén quedará limitada aos venres, sábados, domingos e festivos, é dicir, nas noites de marcha, así como a esixencia de presentar a certificado covid-19 de vacinación, de proba diagnóstica negativa ou de recuperación recente da enfermidade para acceder á hostalería, lecer nocturno, hospitais, residencias, ximnasios e albergues turísticos.
Segundo informa o TSXG, os maxistrados explican na resolución que as medidas teñen como propósito “defender a saúde pública, malograda pola pandemia”, así como conter a expansión do virus.
