A Asociación de Empresarios de Pobra do Caramiñal, a través do seu presidente Manuel Tomé, convocou para este venres 14 de febreiro ao sector do comercio local co obxectivo de facer entrega dos premios aos clientes agraciados cos premios da Campaña de Nadal 2021-2022 da asociación. O acto dará comezo ás 20.45 horas.
Será unha contía de 1.000 euros a repartir da seguinte maneira: 1 premio de 200 euros, outro de 100 e 14 de 50 euros. As persoas agraciadas terán de prazo até o 28 de febreiro de 2022 para facer as súas compras nos comercios adheridos á campaña. Na reunión deste venres recibiran os vales de compra que poderán usar nos establecementos que secundaron a campaña, unha iniciativa que foi posíbel grazas á colaboración dos empresarios do Polígono Industrial.
A patronal da Pobra quixo recordar tamén que “o Concello non respondeu á nosa solicitude de colaboración de data 9-11-2021, por importe de 15.000 euros”, segundo explicou a entidade nun comunicado, no que os seus responsábeis din “non entender as razóns deste comportamento, a pesar de indicar ao Consistorio, no escrito, que todos os Concellos do Barbanza colaboraron coas respectivas patronais con importes entre 15.000 e 30.000 euros en cada exercicio”.
