A Deputación promocionará o berberecho de Noia nun encontro gastronómico en Madrid coincidindo con FITUR

O berberecho de Noia será con outros produtos da provincia, un dos protagonistas dunha demostración gastronómica organizada pola Deputación en Madrid.

O showcooking promocional correrá a cargo de membros da Asociación Coruña Cociña e terá lugar o xoves, ás 18.00 horas, no restaurante Nado. A actividade forma parte dos actos paralelos organizados con motivo da celebración de FITUR.

Da elaboración do menú encargaranse os cociñeiros Javier Freixeiro, Moncho Bargo, Antonio Amenedo, Pablo Pizarro e Iván Domínguez. O encontro estará dirixido a xornalistas especializados e blogueiros.