O presidente da Deputación da Coruña, Valentín González Formoso visitou este 16 de decembro a sede de Amicos en Boiro, acompañado do alcalde José Ramón Romero e das deputadas de Educación e Benestar Social, Sandra González e Ana Lamas. Na súa estadía no centro de Comoxo, o presidente referendou o compromiso da entidade para levar a cabo o proxecto de ampliación da residencia para grandes dependentes da asociación, “que funciona as 24 horas, os 365 días de ano e ten unha ocupación do 100% e unha elevada demanda”, dixo.
Valentín González foi recibido na sede de Amicos pola presidenta da entidade, Esther Vidal, a vicepresidenta, Diana Iglesias e o director xeral, Xoán España, que explicaron os diferentes programas e servizos que ofrecen nos seus centros a máis de 600 persoas con diversidade funcional nunha ampla zona xeográfica que vai desde Vilagarcía ata Outes.
O presidente enxalzou na súa visita o labor de Amicos a prol da integración e a dignificación das persoas con diversidades funcionais ou cognitivas: “É para nós un orgullo visitar Amicos, unha referencia no eido da protección das discapacidades, na integración, no modo de facer as cousas, de estar ao carón das familias”. Destacou tamén que Amicos “é unha referencia en innovación social en Galicia” e representa “un modelo a seguir para o futuro das entidades sociais, polo que temos que seguir investindo e apoiándoos en todo o que poidamos no importante labor que desenvolven no eido social”.
González Formoso explicou que a residencia é un dos servizos da asociación que conta co apoio económico da Deputación, que financia con achegas de entre 15.000 e 20.000 euros cada ano o servizo para persoas en situación de emerxencia social cuxas familias non poden facerse cargo do importante custe que supón a praza, que rolda os 2.300 euros mensuais no sector privado, polo que “é imprescindíbel o apoio e o compromiso das administracións”.
A presidenta da asociación, Esther Vidal, agradeceu “a colaboración da Deputación, da que sempre tivemos apoio, agora imos recibir un vehículo e tamén a emprender outro proxecto máis, o da ampliación da residencia, para o que xa temos a licencia municipal e estamos á espera dos cartos”.
O presidente anunciou tamén a próxima entrega, a principios de 2022, dun novo vehículo de transporte adaptado para os usuarios e usuarias da entidade con sede Boiro e en Ribeira (Oleiros). “Será un dos cinco que a Deputación vén de adquirir para outras tantas entidades sociais da provincia”, dixo.
Valentín González interesouse tamén polos investimentos co-financiados pola Deputación da Coruña para a dixitalización e mellora da eficiencia enerxética nas instalacións da asociación, que incluíron a instalación de paneis de enerxía solar fotovoltaica e que durante este ano supuxeron algo máis de 50.000 euros. “Amicos será o primeiro centro social de España con cero emisións, algo medíbel e validado por AENOR o MITECO”, afirmou o director xeral da entidade, Xoán España, que sostivo que, amais de cumprir cos obxectivos ODS da Axenda 2030 e situar ao centro na vangarda estatal neste ámbito, esta aposta supón para Amicos un importante aforro económico cada ano. España afirmou que “un dos motores deste centro foi sempre a Deputación da Coruña” e agradeceu o apoio da institución provincial para os distintos programas e servizos que oferta o centro aos seus usuarios.
