O Concello de Outes, a través do Centro de Información ás Mulleres CIM, organiza para este tempo festivo que se aproxima unha proposta de actividades de tempo libre para achegar lecer á rapazada e conciliación para as familias. Estamos a falar do Campamento Tempo de Nadal, para crianzas do termo municipal de idades comprendidas entre os 3 e os 12 anos. Trátase dunha proposta abeirada ao programa Outes Concilia, que está previsto desenvolver os días 22, 23, 24, 27, 28, 29, 30 e 31 de decembro e máis os días 3, 4, 5 e 7 de xaneiro, en horario de 8:00 a 16:00 horas, no edificio autónomo do CEIP Plurilingüe de Outes.
Segundo informou o Concello, as familias poderán facer uso do servizo en función das súas necesidades, “permitindo as entradas e saídas flexíbeis”. As nenas e nenos terán opción de almorzar e xantar no servizo, sendo as familias as encargadas de aportar os alimentos en termos e neveiras. Haberá prazas limitadas. O prezo público establecido na ordenanza reguladora corresponde e ascende a 30 € o total do campamento, por días soltos 6 €.
