O Concello de Outes publicou a resolución das axudas convocadas “para a promoción da autonomía persoal e a accesibilidade”, que se financian grazas á achega da Deputación Provincial para o POS adicional destinado a “gastos sociais”. Máis polo miúdo, estes apoios beneficiarán a unha ducia de persoas, recursos que viñan cunha contía máxima de 5.000 €, e que foron convocados o pasado mes de novembro polo Concello.
Segundo fontes do Consistorio, as modalidades máis solicitadas foron as destinadas á eliminación de barreiras e a adaptación funcional do fogar así como a adquisición de camas articuladas, con cinco solicitudes atendidas cada unha delas. Outra das modalidades financiada destinarase á adquisición dunha cadeira xiratoria para bañeiras e outra máis para soporte técnico de apoio a unha persoa con déficit de visión.
O alcalde de Outes, Manolo González, e a concelleira de igualdade e benestar, Raquel Garcia, destacaron a importancia desta convocatoria que “por vez primeira púxose en marcha no Concello, e que se agarda repetir en 2022”. Tamén puxeron o foco en que con esta iniciativa “atendemos ás necesidades dos nosos maiores e dependentes, unha das prioridades do noso Goberno”, apuntou González. O concello destinou 15.000 € a estas axudas, das que se cubriron un total de 14.096,44 €.
