O arcebispo de Santiago será recibido este xoves polo Papa no Vaticano

O arcebispo de Santiago, Monseñor Julián Barrio, encabeza a delegación dos bispos da Provincia eclesiástica de Santiago na Visita ad limina, no marco da cal este xoves, 16 de decembro, manterá un encontro no Vaticano co Papa Francisco.

Segundo informou o Arcebispado de Santiago, os bispos españois foron convocados á visita ad limina Apostolorum entre esta semana de decembro e durante o mes de xaneiro.
Julián Barrio encabeza a delegación dos bispos da Provincia eclesiástica de Santiago que xunto coas de Oviedo, Burgos, Pamplona e Tudela e Zaragoza serán recibidos polo Papa Francisco do 13 ao 18 de decembro.
Segundo o Directorio para o Ministerio Pastoral dos Bispos, Apostolorum Successores o Bispo diocesano realiza cada cinco anos esta antiga tradición, “para honrar os sepulcros dos santos Apóstolos Pedro e Pablo, e atoparse co sucesor de Pedro, o Bispo de Roma”.

A visita céntrase en tres actos. En primeiro lugar, unha peregrinación ás tumbas dos apóstolos Pedro e Pablo para “visibilizar a unidade e a comuñón dos bispos, sucesores dos apóstolos, co sucesor de San Pedro e das Igrexas locais coa Igrexa primada de Roma”, explicou.

En segundo lugar, terá lugar a presentación ao Papa dunha “relación quinquenal” de cada diocese. Trátase de informar sobre a situación da Igrexa na diocese que cada bispo ten encomendada. E é que, cada bispo enviou xa hai tempo a Roma un informe sobre o estado da diocese desde a última visita ad limina, que para os bispos das dioceses con sede en Galicia foi en marzo de 2014.

E, finalmente, un encontro persoal co Papa, como sucesor de san Pedro, durante o cal os bispos dispoñen dun tempo para dialogar co papa e exporlle as súas inquietudes e expoñerlle os seus proxectos.

Nesta ocasión a audiencia co Santo Pai do arcebispo de Santiago terá lugar este xoves, 16 de decembro, ás 10,30 horas.

Tamén o bispo de Ourense atópase esta semana en Roma con motivo da Visita ad limia, no marco da cal tamén será recibida polo Papa.