Noia aposta firme polo espírito solidario e creativo neste Nadal

Noia vai celebrar un Nadal solidario, participativo, integrador e formativo. Nesta liña insírense citas como a deste domingo 26 de decembro: un festival benéfico de zumba organizado por Kitis Katis Dance Class (en colaboración co Concello) a favor de ASGHOP, a Asociación Galega de Heteroplasia Ósea Progresiva. O festival será como dixemos o domingo 26 de decembro, ás 19.30, no Pavillón Alonso Rodríguez. As entradas poderanse adquirir a través de ambas asociacións. Ademais contarán cunha fila 0 para todas aquelas persoas que queiran colaborar coa compra da entrada, pero que non poidan asistir ao evento.

Presentación da actividade de zumba

A maiores, a concelleira de Deportes e Xuventude de Noia, Laura Salgado, presentou unha nova edición do Campamento de Nadal, dirixido aos rapaces de entre 3 e 12 anos, que dará comezo o día 22 de decembro e rematará o 4 de xaneiro. Este ano, como novidade, o campamento ofrecerá o servizo de madrugadores, a partir das 07:30h, e tamén o servizo de recollida ata ás 14:30h que permite aos cativos estar unha hora máis. As inscricións deben facerse na Casa do Concello a partir do 16 de decembro.

Asemade, dende Xuventude de Noia puxeron en marcha unha actividade-concurso que consiste en convidar á mocidade a facerse un selfie con decoración de Nadal. Haberá premios para as máis destacadas contribucións: vales para gastar no comercio local por valor de 200 euros para a primeira clasificada, 100 para a segunda e 50 para a terceira. O concurso Recunchos de Nadal en Noia diríxese a mozas e mozos de entre 14 e 30 anos. Para participar as persoas interesadas deberán fotografarse co seu dispositivo a carón dalgún dos recantos decorados do Nadal do Concello e enviar logo a imaxe á conta nadalennoia@orbitainfantil.com. Para máis información, cómpre visitar as bases do concurso na web do Coliseo Noela, en www.coliseonoela.com.

A maiores de todo o devandito, lembrar que Noia inaugurou o alumeado e a decoración urbana o pasado 2 de decembro, un engalanamento de rúas e prazas que proseguiu ao longo dos días seguintes. Por outra banda, xa se pode visitar en Noia o belén animado da igrexa de Santa María A Nova. O horario de visitas será de luns a sábado, de 10:30h a 13:30h e de 16:00h a 20:00h. Os domingos poderemos visitalo so en horario de mañá de 11:00h a 14:00h.