Este 2 de xaneiro toca festexar na Pobra do Caramiñal o canto, o baile e a música tradicional, co engadido extra de facelo en clave humanitaria e a prol do ben común. Estamos a falar do evento Nadal con Caramiñas, un festival solidario a favor da loita contra o cancro que organiza a Asociación de Amas de Casa, Consumidores e Usuarios Caramiñas, coa colaboración da Concellaría da Cultura da Pobra do Caramiñal, da cal é titular a edil Patricia Lojo (PSdeG-PSOE). A cita desenvolverase a partir das 18.30 horas, no teatro cine Elma.
A entrada é de balde ata completar a cabida e habilitarase un stand para a recollida de donativos en beneficio da Asociación Española Contra o Cancro (AECC), a través da xunta local da Pobra, para contribuír así á investigación, ademais de axudar na asistencia ás persoas enfermas e familiares.
