Na Pobra detido un home acusado de roubar en tres bares. En Oleiros frustrado un atraco na farmacia

As dependentas da farmacia situada en Salmón en Oleiros, lograron frustrar, na tarde do martes, un intento de atraco. Segundo fontes policiais, un home entrou pedindo diñeiro e pastillas e ameazou con atacalas cun obxecto punzante. Ata o lugar acudiron Policía Nacional e Policía Local, aínda que o atracador, tras toparse co rexeitamento das traballadoras, escapouse antes de que os axentes chegasen.

Pola súa banda a Garda Civil detivo ao propietario dunha vivenda ubicada nos xardíns Valle-Inclán de A Pobra, ao que acusan de presuntamente roubar en tres locais hostaleiros.

Na vivenda segundo fontes da benemérita residen varias persoas con antecedentes por feitos similares e que ademais son consumidores de estupefacientes. Os axentes recuperaron unha máquina rexistradora e outra expendedora de tabaco que foran roubadas nun local anexo á vivenda. Tamén acharon catro chisqueiros novos, moedas e unha chaqueta amarela con bandas reflectoras que supostamente levaba posta o ladrón nas imaxes que quedaron gravadas nas cámaras de vixilancia.

O valor dos obxectos, que se atopan nas dependencias da Garda Civil da Pobra, supera os 4.000 euros. O detido será posto mañá a disposición xudicial, pero desde o corpo non se descartan máis detencións relacionadas por estes feitos delituosos.