A norma que recupera a esixencia das máscaras ao aire libre aprobouse este xoves no Consello de Ministros extraordinario e entra en vigor este venres 24 de decembro desde as cero horas.
España bateu este mércores, por segundo día consecutivo, o seu récord de novos casos desde o inicio da pandemia con 60.041 contagios e a incidencia disparada ata os 784 casos por cada 100.000 habitantes nas últimas dúas semanas.
Sánchez avanzou que a nova norma das máscaras en exteriores incluirá algunhas excepcións (mentres se fai deporte, en espazos naturais como o monte ou a praia ou cando se estea con conviventes) e manterá as situacións recollidas ata o de agora: en interiores e lugares abertos ao público.
O plan de reforzo dos recursos humanos da sanidade pública tamén pasará por contratar a persoal sanitario xubilado, prexubilado e profesionais con título de especialista obtido en Estados non membro da Unión Europea.
Ademais, a partir do 1 de febreiro de 2022, o certificado COVID caducará aos nove meses de recibir a pauta completa, segundo confirmou Moncloa, en liña co acordado pola Comisión Europea a comezos desta semana. Desta maneira, a Unión Europea ha vinculado a vixencia do pasaporte sanitario á aceptación das doses de reforzo.
Por outra banda a Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 18.664 deles 2.985 son da área da Coruña, 1.319 da de Lugo, 2.560 da de Ourense, 2.840 da de Pontevedra, 5.936 da área de Vigo, 2.262 da de Santiago e 762 da de Ferrol. Do total de pacientes positivos, 50 están en UCI, 223 en unidades de hospitalización e 18.391 no domicilio. Polo de agora, en Galicia hai un total de 193.311 persoas curadas, rexistrándose 2.739 falecementos. O número de PCR realizadas é de 3.195.326. O número de doses de vacina contra a covid-19 administradas é de 5.689.473. A Xunta continúa a traballar desde a máxima coordinación interdepartamental e co Ministerio de Sanidade, tamén mantendo o contacto con todos os axentes socioeconómicos de Galicia. Neste senso, Sanidade reitera que segue alerta actualizando todas as medidas e recomendacións e en vixilancia permanente.
Uso do 061 para casos graves e emerxencias e o 881 54 00 45 para dúbidas e síntomas leves
