Ondiñas Mainas celebra o 25-N enchendo Rianxo de bolboretas contra a violencia

A Asociación Ondiñas Mainas, en colaboración co Concello de Rianxo, van celebrar o 25-N (Día Internacional da Eliminación da Violencia contra as Mulleres) con actividades participativas e creativas que contribúan a avanzar en sensibilización e concienciación. Baixo o lema 25-N en Rianxo, As crianzas non deben ser vítimas da violencia vicaria, Ondiñas Mainas convocou á cidadanía para colaborar nun obradoiro colectivo de bolboretas de papel este sábado 20 de novembro, na Piscina Municipal de Rianxo a partir das 17.00 horas.

Estas bolboretas non se limitarán ao ámbito da piscina na devandita xornada do 20. De feito, Ondiñas Mainas está a facer un chamamento aos comercios e institucións de Rianxo para que visibilicen a lacra da violencia ás crianzas convidando a encher escaparates, balcóns, xanelas e outros elementos de bolboretas moradas.

A maiores, a xeito de complemento das celebracións desta data reivindicativa do mes de novembro, as e os participantes poderán implicarse a título individual deixando en papel a súa pegada identificatoria contra a violencia de xénero, sacarlle unha foto e publicala logo nas redes sociais. Colaboran neste programa de actividades o Concello, Rianxo en Negro e BeOne (empresa adxudicataria da xestión da Piscina).