O BNG de Outes convida ao Concello a crear un espazo de posta en valor da Marea do Cunchido

O BNG de Outes vén de facer pública unha demanda de seu, a través de Anxo Núñez (concelleiro) e María Xosé Suárez (voceira local), para a creación dun espazo de posta en valor da Marea do Cunchido-Espiñeiro, que se atopa protexida dentro do LIC Esteiro do Tambre, un “espazo protexido e de gran valor paisaxístico e ambiental” que durante anos, sinalan, foi castigado por continuas achegas de lixo e residuos contaminantes, que finalmente déronse retirado.

Segundo os representantes do BNG, malia que o primeiro punto (o da limpeza de refugallos) foi finalmente levado a cabo por parte do Concello, agora cómpre crear un espazo de posta en valor da Marea da Serra (o segundo apartado da moción presentada polo BNG). Núñez e Suárez felicitaron ao Concello polos traballos levados a cabo e convidárono a abordar estes segundo punto xa que Espiñeiro ten un valor ambiental incalculábel.