A compañía Excéntricas Producións vai estar na Pobra o vindeiro 5 de decembro representando sobre as táboas do cine-teatro Elma o espectáculo Estrela do día, unha comedia chea de cor, música, misterio e humor, onde a palabra poética dos códices foxe do libro e encárnase na escena e as personaxes saen das miniaturas medievais e chegan aos nosos días. A cita desenvolverase como dixemos o 5 de decembro, ás 19.00 horas.
O elenco está composto por Evaristo Calvo, Rocío González, Víctor Mosqueira e Patricia Vázquez, baixo a dirección de Marcos Ptt Carballido e con texto de Quico Cadaval (Ribeira, 1960).
Trátase dunha proposta abeirada á programación cultural do último trimestre do ano con sesións teatrais dirixidas a maiores de 16 anos.
A entrada é de balde e as reservas débense efectuar na casa da cultura e xuventude Raquel Fernández Soler ou a través do teléfono de contacto 981831545. Organiza a Concellaría da Cultura, da cal é titular a edil Patricia Lojo (PSdeG-PSOE).
