De Ste Xeito leva Feminíssimas á Pobra (este 14 de novembro no Elma)

A Pobra segue este mes de novembro en clave de teatro e, principalmente, teatro con nomes e historias de mulleres. Sen ir máis lonxe, este 14 de novembro, ás 19.00 horas, chega ao Elma a peza teatral Feminíssimas, que forma parte da programación cultural que transcorrerá na Pobra durante o último trimestre do ano con sesións teatrais dirixidas a maiores de 16 anos.

O espectáculo vén da man da compañía De Ste Xeito Producións e cóntanos a historia de tres amigas da adolescencia que hai anos que non se ven e que coinciden nun Congreso Feminista na cidade de Vigo: tres amigas que teñen tres maneiras distintas de entender a loita polos dereitos das mulleres.

A peza está dirixida por Xavier Castiñeira e con dramaturxia da autora e actriz rianxeira Esther F. Carrodeguas, quen tamén forma parte do elenco xunto con Stephy Llaryora e Noelia Blanco.

A entrada é de balde e as persoas interesadas en asistir deben formalizar a súa reserva na casa da cultura e xuventude Raquel Fernández Soler ou a través do teléfono de contacto 981831545. Seguiranse as medidas establecidas por mor da COVID-19.

Organiza a Concellaría da Cultura da Pobra do Caramiñal, da cal é titular a edil Patricia Lojo (PSdeG-PSOE), en colaboración coa Rede Cultural da Deputación da Coruña.