Suma Ribeira emitiu este 21 de outubro un comunicado no que fai pública a súa postura respecto ás recentes homenaxes que se están a celebrar no concello ás vítimas da COVID. No escrito a agrupación comeza expresando o seu “máximo respecto e a todas as vítimas do coronavirus, tanto ás que perderon a vida como ás que están a padecer secuelas da enfermidade, así como aos profesionais que estiveron e están nun alto nivel de exposición ao contaxio (persoal sanitario, empregados de supermercados, persoal docente…) traballando, ademais, con altas taxas de estrés e condicións precarias en moitos casos”.
Suma Ribeira considera que “a excepcionalidade do vivido durante a pandemia merece o recoñecemento de todas, sen ningún tipo de cuestionamento nin de apropiación por parte de ningunha forza política nin social”.
E engaden: “Desde a nosa organización, estamos certos de que a maioría dos veciños e veciñas senten a mesma solidariedade ca nós e aplaudirán calquera mostra de recoñecemento ás vítimas, mais sempre que nazan dende o consenso e coa vocación de universalidade que lle son propias a este tipo de homenaxes”.
A plataforma cidadá opina que acto do vindeiro día 23 (o Acto de Homenaxe ás Vítimas da COVID que terá lugar ás 18,30 horas na praza de España, organizado entre o Goberno Municipal e a Asociación de Amas de Casa) “non semella respectar nin fomentar esta desexábel unión e harmonía da nosa cidadanía diversa, nin das distintas forzas sociais e políticas do concello”. A xuízo de Suma Ribeira, “non é un acto nacido entre todos e todas, non é o acto sen dúbida xusto e necesario, de Ribeira como pobo”.
E conclúen: “Lamentamos, máis una vez, este xeito excluínte de proceder por parte da Alcaldía, que nos fixo chegar a comunicación o pasado martes a última hora, tras a súa presentación ante os medios. Non obstante, por responsabilidade e compromiso social, apoiamos a homenaxe, mais declinamos participar institucionalmente no mesma”.
