Representantes autonómicos e locais do Bloque Nacionalista Galego mantiveron este 25 de outubro unha xuntanza de traballo cos responsábeis da organización humanitaria Sen Valos, para establecer medidas conxuntas a prol da integración social das persoas migrantes. Na reunión participaron o deputado do BNG Congreso, Néstor Rego, a deputada no Parlamento de Galiza, a pobrense Rosana Pérez, e a voceira municipal do BNG na Pobra do Caramiñal, Amparo Cerecedo. A formación nacionalista comprometeuse a traballar no eido institucional para que “a lei de estranxeiría sexa modificada para garantir unha verdadeira cohesión social e que se respecten os dereitos do colectivo migrante, refuxiado e solicitante de protección internacional”.
Durante a xuntanza organizada polo BNG da Pobra do Caramiñal, a súa voceira, Amparo Cerecedo, agradeceu a participación dos deputados da formación nacionalista e a predisposición da ONG Sen Valos para falar sobre as liñas de traballo a desenvolver sobre a aplicación da lei de estranxeiría. Pola súa banda, o presidente da organización humanitaria, Patxi Hurtado, trasladou as inquedanzas existentes que se derivan dos procesos de regulamento e a adquisición de dereitos por parte das persoas inmigrantes. Segundo dixo, “estes procesos están vencellados a unha condicións laborais específicas como pode ser ter contratos laborais dun ano a xornada completa”. Estas condicións “son irreais e non están adaptadas á realidade existente”, explicou Hurtado, facendo saber que “esta situación provoca unha maior dificultade na regularización e, polo tanto, na adquisición de dereitos por parte do colectivo inmigrante, refuxiado e mesmo as persoas solicitantes de proteccións internacional”.
Para rematar, o deputado do BNG no Congreso, Néstor Rego, comprométese a traballar a prol da recuperación de dereitos e evitar a exclusión social. Segundo dixo, “as institucións públicas non poden virar as costas á realidade e deben asumir as súas responsabilidades nesta materia pois os fluxos migratorios prodúcense de maneira forzada por razóns de carácter económico, social, político e mesmo ambiental e cada vez son máis frecuentes”, comentou, engadindo que “as políticas dos países da Unión Europea, incluído o Estado español, provocan en moitas ocasións estes fluxos migratorios de refuxiados”. Na súa opinión, cómpren políticas que “favorezan o desenvolvemento social e económico que evite os fluxos migratorios”.
