O BNG agradece á veciñanza de Outes a súa participación nas propostas parroquiais

O BNG de Outes vén de rematar a súa campaña de propostas parroquiais abertas que, por vez primeira, tivo que desenvolverse de maneira exclusivamente dixital por mor das condicións sanitarias. En palabras da voceira municipal, María Xosé Suárez, “é unha mágoa que tiveramos que cinguirnos só ás redes cando o que buscamos é o trato próximo coa veciñanza para recoller as súas propostas e preocupacións. Malia as dificultades consideramos a campaña un éxito polos centos de propostas que nos achegou a cidadanía á cal queremos agradecer a súa participación un ano máis. A nosa maneira de facer política é con e para a xente, co único de interese de que Outes avance”.
Segundo engadiu, o BNG continuará facendo “o seu traballo de oposición construtiva, achegando propostas ao pleno da Corporación municipal mais tamén facendo un control exhaustivo da actividade do Goberno e seguindo, de preto, se cumpren ou non coas demandas da veciñanza”. Asemade, laiouse de que “logo de case dez meses achegando as propostas parroquiais, na súa maioría, de fácil solución, os movementos do Goberno para cumprir coas mesmas son inexistentes”. E engadiu: “Retomaremos as visitas presenciais por parroquias e seguiremos na nosa liña de facer a política o máis participativa posíbel”.