O vicepresidente e deputado de Turismo, Xosé Regueira, acordou esta semana cos Concellos de Mazaricos, Dumbría e Carnota poñer en marcha un proxecto de sinalización e mellora de seguridade no Monte Pindo e propoñer este espazo para a certificación como destino de turismo científico Observer.
Este acordo foi tomado nun encontro no que participaron, ademais de Xosé Regueira, o alcalde e a técnica de Turismo de Carnota, Juan Manuel Saborido e María Lago, e o deputado provincial e alcalde de Dumbría, José Manuel Pequeño.
O obxectivo fundamental do proxecto é “a sinalización e mellora da seguridade do Monte Pindo coa finalidade de evitar situacións de visitantes que se extravían nesa contorna, mais tamén a mellora da calidade turística do espazo”. En palabras de Regueira, “cómpre ter en conta que este cumio é un recurso de primeira orde tanto da provincia como de toda Galiza, cunha compoñente xeolóxica moi potente e cunha tradición oral e unha mitoloxía riquísimas, que é preciso ordenar e poñer en valor como un produto turístico de cara a configurar paquetes e comercializalos no mercado”.
Xosé Regueira explicou que o proxecto inicial presentado polos tres Concellos está “tecnicamente moi ben desañado”, recollendo a localización dos servizos e mesmo incluíndo propostas de contidos para a web e indicacións con innovacións para a mellora dos percorridos. Neste sentido, o vicepresidente indicou que “tras este traballo inicial estudarase a posibilidade de introducir parámetros que incrementen a calidade da experiencia de destino, a seguridade do visitante, e que permitan xerar ingresos destinados a protexer e ordenar o acceso a este espazo natural”.
