A Cruz de Lampedusa chegou á Pobra para divulgar o drama da migración no CPR Divino Maestro Feita na illa italiana que lle da nome, e tallada a partir dun caiuco naufragado no que morreron preto de 360 peroas, foi bendecida polo Papa Francisco.
No contexto da inmigración subsahariana cara Europa, un dos caiucos que transportaba a preto de cinco centas persoas afundiu fronte á costa da illa italiana de Lampedusa. O balance foi o rescate de 155 supervivintes e a morte de 360 persoas, aproximadamente. Isto xerou unha gran conmoción na sociedade italiana, chegándose a decretar un día de loito nacional neste país. O carpinteiro Francesco Tuccio compuxo unha cruz latina cos restos de madeira deste naufraxio, en conmemoración dos falecidos, erguendo unha peza de 60 kilogramos, 2,80 de altura e 1,50 metros de ancho. Posteriormente, no ano 2014, o Papa Francisco bendeciu a Cruz de Lampedusa e pediu que esta obra recorrese o mundo. Atendendo a este contexto, nesta semana o centro de formación profesional Divino Maestro da Pobra do Caramiñal recibiu a visita da Cruz, que serviu para concienciar ao alumnado do drama que supón a migración. Os estudantes asistiron a charlas explicativas sobre a problemática da migración e a necesidade de ofrecer respostas solidarias e humanitarias a este drama. Tamén realizaron actividades centradas na migración e o dereito a ter unha vida digna con independencia da raza, relixión ou cultura. Adxúntanse imaxes do alumnado coa Cruz de Lampedusa.
