A Asociación de Empresarios da Pobra (AEPuebla) vén de emitir un comunicado no que manifesta a súa preocupación pola recente vaga de roubos no concello e as medidas que se puxeron en marcha para atallala. De feito, o elevado número de roubos motivou que a patronal contactase coa Garda Civil de Boiro ao obxecto de coñecer información relativa ás xestións realizadas polo devandito corpo para atallar o devandito problema e o resultado das mesmas.
Segundo informa a asociación, foille comunicada dende o Cuartel de Boiro a detención de dúas persoas detidas, así como do rexistro de “pistas moi positivas” para proceder de inmediato á detención do resto dos presuntos ladróns.
A patronal da Pobra salienta no comunicado o feito de que nada máis realizar a referida entrevista do destacamento de Boiro, recibiu información dun novo roubo noutro café-bar que repetía a mesma escena de días pasados.
A Asociación de Empresarios tamén pon foco no traballo despregado pola Policía Local, que se “atopa baixo mínimos en persoal”, sinalan, engadindo que “este feito imposibilita a garda nocturna que sen dúbida dificultaría en gran medida as actuacións destes cacos”. A patronal aproveita para requirir ao alcalde que “inicie o proceso para dotar a este corpo de gardas suficientes para cubrir o servizo nocturno de forma urxente e pór orde a esta situación”. E engaden: “Novamente as xestións da Garda Civil de Boiro merecen unha vez máis o noso agradecemento que xa realizamos persoalmente”.
