A próxima semana a Audiencia Provincial en Santiago serán escenario do xuizo dun probrense que deberá responder como presunto autor dun delito de incendio polo que a Fiscalía reclama 14 anos de prisión e tamén quebrantamento de condena, que suma outros oito meses máis de cárcere.
Os feitos polos que terá que comparecer o venres na Audiencia tiveron lugar a finais de maio do ano pasado cando ás desavinzas entre familiares fixo que un deles prendera lume ao rocho onde vivía o seu irmán. O imputado tiña unha orde de afastamento do seu parente, quen se viu obrigado a irse a vivir ao rocho, mentres que o procesado e a súa nai residían nun piso dese mesmo edificio situado na urbanización de O Lagar.
Uns días antes do suceso protagonizaron unha pelexa na que o acusado agrediu e ameazou de morte á vítima. Aproveitando que a súa proxenitora marchouse a traballar, o 28 de maio rebentou a porta do rocho no que durmía o seu familiar e sacou do habitáculo todos os seus aveños.
Os axentes da Policía Local que chegaron ao lugar fixérono recapacitar e devolveu todo ao seu sitio, pero pouco despois cambiou de opinión e decidiu prenderlles lume. O incendio propagouse con rapidez fixo que todos os garaxes e rochos situados en dúas plantas se encheran de fume.
Os veciños do edificio tiveron que ser desaloxados durante horas, e unha decena de vehículos víronse afectados polo fume e as cinzas.
