O libro Don Carlos e o misterio dos lucecús preséntase este venres na Pobra

Dende o selo Baía Edicións veñen de compartir un recordatorio sobre a súa presenza este venres na Pobra, onde organizará, xunto coa Asociación Cultural Barbantia e o Concello, no Auditorio do Museo Valle-Inclán, a presentación da novela infantil Don Carlos e o misterio dos lucecús, da escritora, xornalista e museóloga sonense Patricia Torrado Queiruga. A cita será este venres 1 de outubro a partir das 20.00 horas.

Neste acto participará a autora, acompañada pola escritora e académica Fina Casalderrey, pola concelleira de Cultura, Patricia Lojo, e pola directora de Baía Edicións, Belén López Vázquez, que se encargarán de realizar un achegamento crítico a esta obra dirixida ao público infantil.