O BNG está a levar a cabo dende hai meses unha campaña de recollida de sinaturas entre a veciñanza da comarca de Muros-Noia, destinadas a recadar apoios a prol de medidas que fagan real e efectiva unha baixada do prezo da luz. Segundo sinala a agrupación, xa foron entregadas no mes de xullo, no Parlamento Galego, 24.000 rúbricas. Agora, “ante a escalada sen teito da factura eléctrica”, comeza unha segunda fase de recollida de sinaturas.
Segundo lembra o BNG poñéndonos en situación, “na última década, no caso da electricidade, a factura aumentou un 87%, mentres os salarios e as pensións perderon poder adquisitivo. Nun país que produce electricidade a esgalla, 450.000 persoas non poden prender a calefacción e 73.000 fogares teñen dificultades para pagar a factura da luz”. Ademais, engaden, a nosa terra foi e é unha potencia eléctrica, que produce máis enerxía da que consume. “O excedente vai para fóra, sobre todo para Madrid, e, aínda así, as galegas e galegos non nos beneficiamos deste feito de ser produtores e pagamos a mesma factura que na capital de España e outras zonas do Estado, que non producen nada”. É por isto que o BNG está a reclamar unha tarifa eléctrica galega, “que teña en conta esta condición de produtores, debendo repercutir deste xeito nunha baixada substancial da factura, tanto en particulares como nas empresas”.
