A Asociación Ambar das Persoas con Diversidade Funcional impartirá este xoves 9 de setembro a primeira xornada do obradoiro para mulleres A Tribo do Autocoidado, unha iniciativa destinada á poboación feminina da comarca da Barbanza con vistas a “reactivar as súas ferramentas para o autocoidado e o afrontamento do estrés” e a través “dunha perspectiva de amabilidade e respecto”. As inscricións poden facerse até este mércores 8 a través da web da asociación con sede en Ribeira e A Pobra.
Esta actividade forma parte do programa OIGO, Programa Integral de Empoderamento e autoxestión para mulleres, e ten financiamento da Secretaría Xeral da Igualdade.
Nos obradoiros, durante cinco sesións de tres horas, as participantes poderán exercitar e desenvolver as súas habilidades persoais para o autocoidado, mediante o exercicio de prácticas de mindfulness, terapia gestalt e psicodrama.
As actividades, que son totalmente de balde, desenvolveranse todos os xoves de setembro cun grupo de 10 persas máximo. Serán impartido por Mª Carmen Glez. Hermo, psicóloga na Asociación Ambar, experta en psicoloxía de emerxencias, membro do Grupo de Intervención Psicolóxica en Catástrofes e Emerxencias e membro do equipo fundador do Espazo de Autocoidado do COPG.
