A Biblioteca Municipal Victoriano García Martí da Pobra do Caramiñal achega estes días dúas importantes citas para o público infantil. Para comezar, este 7 de outubro, ás 18.00 horas, será a quenda de Aventuras dunha toupa arqueóloga, a cargo de Pedras de papel. Trátase dun contacontos con monicreques e obxectos que achega o traballo das arqueólogas e o patrimonio cultural galego ás crianzas a través das aventuras dunha toupa arqueóloga, coñecida como Harris, que escava unha mámoa sobre a que existe unha curiosa lenda. Alí atopará unha serie de debuxos xeométricos, así como moitos segredos agochados baixo terra.
Ademais, no 14 de outubro, ás 18.00 horas, terá lugar na Biblioteca o espectáculo Bibliotemaxia. A través dunha historia máxica repleta de referencias literarias, Leo Leiño vai contando como se fixo maga e inventora. Unha sesión chea de risas para toda a familia.
As prazas son limitadas, polo que é preciso realiza-la reserva a través do enderezo electrónico bibliotecadapobradocaraminal@gmail.com ou do teléfono de contacto 981 831 633, indicando nome, apelidos e teléfono de contacto. Seguiranse as medidas implantadas por mor da COVID-19.
Organiza a Concellaría da Cultura da Pobra do Caramiñal, da cal é titular a edil Patricia Lojo (PSdeG-PSOE), ao abeiro do programa Ler Conta Moito.
