O equipo de drons da Axencia Galega de Emerxencias (AXEGA) está a participar no operativo activado pola Policía Nacional para a busca dunha septuaxenaria desaparecida en Santiago.
Trátase de María Chico Prieto de 76 anos de idade é veciña da parroquia compostelana de Enfesta e padece alzhéimer.
Segundo a información recollida polo 112 Galicia, a muller ten algún problema de saúde e falta da casa, localizada na parroquia da Enfesta –no concello de Santiago de Compostela-, desde a noite de onte.
O Centro Integrado de Atención ás Emerxencias (CIAE) 112 Galicia tivo constancia da desaparición pouco antes das dez horas da mañá de hoxe, a través da Policía Nacional. Solicitábase a incorporación de efectivos de emerxencia na operación de busca e, particularmente, da Unidade de Drons do Grupo de Apoio Loxístico (GALI) da AXEGA, que conta con vehículos aéreos non tripulados para rastrexar a zona e, así, facilitar as labores de procura de persoas desaparecidas.
Ademais, o operativo tamén conta coa colaboración da Garda Civil, do Grupo de Cans de Rescate de Protección Civil de Padrón e dos efectivos de Protección Civil de Santiago.
Arestora, os servizos de emerxencia permanecen na procura da muller desaparecida.
